Grao en Administración e Dirección de Empresas

O grao en Administración e Dirección de Empresas supón unha alternativa moi atractiva debido ás altas taxas de inserción laboral, maioritariamente na empresa privada, e ás beneficiosas condicións salariais. Nos últimos anos é a titulación con máis saídas profesionais, xa que, segundo o último Informe Infoempleo Adecco, o 4,5% das ofertas de emprego publicadas fai referencia específica a esta titulación e os seus titulados/as poden optar ao 10,65 % das ofertas nas que se solicitan estudos universitarios.

Con todo, a saturación do mercado laboral tamén afecta á contratación deste tipo de profesionais. Isto quere dicir que se queremos estar seguros ao 100% de obter un traballo cunha titulación de ADE será necesario que ademais obteñamos unha certificación dun nivel alto de inglés e adquiramos “habilidades brandas”.

Perfil de ingreso

Os estudos de Administración e Dirección de Empresas (ADE) van dirixidos a persoas cunha especial sensibilidade polo espírito emprendedor e creativo, ademais dunha predisposición para adquirir competencias relacionadas coa comprensión do ámbito empresarial, a interpretación da realidade económica e a aplicación dos coñecementos para unha xestión eficiente da empresa.

Saídas profesionais

As principais áreas de actividade para unha persoa que consiga o Grao en ADE son as seguintes:

• Creación da túa propia empresa
• Auditoría de contas
• Consultoría
• Dirección Xeral
• Dirección económica-financeira
• Marketing, trade marketing e ventas
• Dirección da área internacional da empresa
• Banca e servizos financeiros: executivos/as comerciais, dirección de oficina, dirección comercial, analistas de riscos, xefe/a de servizo de estudos, analistas de sociedades de valores, banca de inversión, xestión de patrimonios, carteras e fondos...
• Outras áreas: departamentos de loxística e compras, xestión de operacións, departamentos fiscais, recursos humanos, calidade, innovación, emprendemento, desenvolvemento organizativo, responsabilidade social corporativa, departamentos de estudos; etc.