Carlos Gradín, profesor da Facultade, será o encargado de realizar a laudatio no acto de investidura de Joseph E. Stiglitz como doutor honoris causa pola Universidad Internacional Menéndez Pelayo (UIMP). O acto celebrarase o domingo 28 de septiembro ás 12 horas e poderá seguirse na canle de televisión da UIMP (https://uimptv.es/ ). Stiglitz, premio Nobel de Economía, é actualmente profesor da Universidade de Columbia, e é un dos economistas máis lidos e recoñecidos do mundo. As súas contribucións son especialmente relevantes no ámbito da economía pública (en xeral) e da teoría da información asimétrica, en particular, entre outras. Os seus libros máis recentes critican o modelo de globalización imperante, e destacan a orixe e os problemas asociados aos altos niveis de desigualdade existentes e ás limitacións do PIB como indicador do progreso económico e social. Stiglitz foi presidente do Consello de Asesores Económicos da Administración Clinton e economista xefe do Banco Mundial (entre moitos outros cargos relevantes).
